Բեթթին՝ Էլիզաբեթ Դանիելյանը, ծնվել է 2003 թ. մարտի 7-ին: 4 տարեկանում ընդունվել է Պարարվեստի պետական ուսումնարան, զուգահեռ հաճախել նաև քոլեջ: Գերազանց սովորել է Ա. Պուշկինի անվան համար 8 դպրոցում: 6 տարեկանում ընդունվել է Երգի պետական թատրոն: Դեռ մանկուց զբաղվել է պրոֆեսիոնալ երգեցողությամբ:
Էլիզաբեթն այս ամենին զուգահեռ հաճախել է երաժշտական դպրոցներ, Ազգային գեղագիտական կենտրոն, սովորել է ասեղնագործություն, օրիգամի, նկարչություն, զբաղվում է խեցեգործությամբ: Էլիզաբեթը բացարձակ տիրապետում է չորս լեզվի՝ անգլերենի, իսպաներենի, ռուսերենի, հայերենի: Այժմ սովորում է չինարեն:
Բեթթին բազմաթիվ երգերի և բանաստեղծությունների հեղինակ է, հաճախել է բալետի, վոկալի անհատական դասերի, կիթառի, այժմ սովորում է նվագել հարվածային գործիքներ: 7 տարեկանում ձայնագրել է «Պարաշփոթ» զուգերգը: 8 տարեկանում «Կարևորը` լուսավոր է» երգի հիման վրա նկարահանել է իր առաջին անհատական տեսահոլովակը:
Սկսած 2012 թվականից տարիներ շարունակ Բեթթին աշխատել է Հայաստանի բոլոր առաջատար հեռուստատեսություններում, այդ թվում՝ Հայաստանի Հանրային հեռուստաընկերությունում՝ որպես հաղորդավար։ Վարել է տարբեր ձևաչափերի հաղորդումներ, որոնց թվում են «Հրաշալի յոթնյակ Բեթթիի հետ», «Տանը մենակ» հաղորդաշարերը: Բեթթին հեռուստատեսությունում է հայտնվել, սակայն, ավելի վաղ տարիքում: Նա հաճախ էր նկարահանվում «Հայրենիք» մանկական հեռուստաալիքի «Քաղաքավարության կանոնները» հաղորդման շրջանակներում: Նաև Էլիզաբեթ Դանիելյանը «Բեթթի Շոու» հեռուստանախագիծը վարելու նպատակով հրավեր է ստացել Հայաստանի ամենահեղինակավոր երաժշտական հեռուստաալիք 21TV–ի կողմից։
2012-ը Բեթթիի համար հագեցած տարի էր ոչ միայն հեռուստաեթերների, այլև համերգների առումով: Նա որպես հյուր մասնակցել է մանկական «Նոր ալիք» միջազգային մրցույթին: Էլիզաբեթը բազմաթիվ մրցույթ-փառատոնների մրցանակակիր է, որոնց թվում է «Կենգուրու» մաթեմատիկական մրցույթը: 2012թ. ամռանը Բեթթին մասնակցել է Թուրքիայում կայացած մանկական սպորտային օլիմպիադային՝ Հայաստան բերելով 4 ոսկե մեդալ (հաղթելով իր մրցակիցներին մինի գոլֆ, դարձ, ջենգա մրցաձևերում):
2013թ.-ին Էլիզաբեթ Դանիելյանը Հայաստանի Հանրային հեռուստառադիոընկերության կողմից ճանաչվել է «Հայաստանի մանկական լավագույն հեռուստադեմք»:
2014թ.-ին Բեթթին մասնակցության հայտ ներկայացրեց «Նոր Ալիք» ամենամյա միջազգային երաժշտական մրցույթ և անցավ կիսաեզրափակիչ (Մոսկվա):
2014թ.-ին Բեթթին մասնակցության հայտ է ներկայացրել և մասնակցել է Մանկական Եվրատեսիլի Հայաստանյան նախընտրական փուլին, որտեղ “People of the Sun” երգով 87 մասնակիցներից ճանաչվել է հաղթող: Այդ հաղթանակի շնորհիվ Բեթթին Հայաստանը ներկայացրել է Մանկական Եվրատեսիլ ամենահեղինակավոր երգի մրցույթում և դարձել մրցանակակիր` զբաղեցրել է երրորդ մրցանակային տեղը: Ի դեպ, իր մրցակցին զիջել է ընդամենը մեկ միավոր։ Բեթթին մինչ օրս Մանկական Եվրատեսիլ երգի միջազգային մրցույթում ամենաշատ 12 միավոր ստացած մասնակիցն է:
2014թ.-ի ազգային մանկապատանեկան երաժշտական ամենամյա մրցանակաբաշխությունը Բեթթիին շնորհեց հատուկ մրցանակ՝ Հայաստանը Եվրատեսիլում լավագույնս ներկայացնելու համար:
2015 թ․ Բեթթին Հայաստանի Հանրային Հեռուստաընկերության կողմից ստացել է հրավեր աշխատելու որպես հաղորդավար և վարել է «Ինչուների մոլորակ» հաղորդաշարը։
2015 թ․ Բեթթին մեկնել է Բուլղարիա և այնտեղից,որպես Հայաստանի խոսնակ,հայտարարել է հայաստանյան միավորները «Եվրատեսիլ» երգի միջազգային մրցույթի շրջանակում։
2016-ի հունիսի 7-ին տեղի ունեցավ Բեթթիի (Էլիզաբեթ Դանիելյանի) հեղինակային պատանեկան «New Generation» նախագծի համանուն երգի տեսահոլովակի շնորհանդեսը: Էլիզաբեթ Դանիելյանի, հաղորդավարական փորձառության և արտիստական հմտությունների սինթեզի արդյունքում ծնված «New Generation» նախագիծը բոլորովին նոր ձևաչափ է, որի կոնցեպտը, նաև Բեթթիի մասնակցությամբ, հեռուստատեսային նախագծերի և համերգային ծրագրերի հիմքն է դարձել ու դառնալու, որով Բեթթին մանկությունից անցում է կատարում դեպի պատանեկություն: «New Generation» նախագծի հաղորդագրությունը կոչ է նոր սերնդին համախմբվելու, միավորվելու, սեփական ուժերին և կարողություններին հավատալու և վստահ առաջ շարժվելու:
2016 թ․ Բեթթին եղել է «Եվրատեսիլ»միջազգային մրցույթի միջազգային ժյուրիի անդամ։
2016 թ․ Բեթթիի անունն ընդգրկվել է «Լավագույն մարդիկ․Կրթության մեջ լավագույնը» միջազգային հանրագիտարանի 2016 թվականի հատորում: Ի դեմս Բեթթիի` նախաձեռնության հեղինակները տեսնում են անհատականության, ում պատկանում է ապագան. ահա թե ինչու հանրագիտարանում Բեթթիի մասին հոդվածները հրապարակվել են «Նրանց է պատկանում ապագան» ենթաբաժնում:
2017 թ․ Բեթթին եղել է «Եվրատեսիլ» երգի մրցույթի նախընտրական «Դեպի Եվրատեսիլ» նախագծի հայաստանյան ժյուրիի անդամ։
2017 թ. Բեթթին մեկնեց Ամերիկայի Միացյալ Նահանգներ և սեպտեմբերին ԱՄՆ կառավարության կողմից ճանաչվեց որպես EXTRAORDINARY անձ: Նման կարգավիճակ տրվում է արտակարգ ունակությունների տեր սահմանափակ թվով մարդկանց՝ բացառապես փայլուն գործունեության ու անցած ճանապարհի հիման վրա:
2017 թ․Բեթթին ԱՄՆ-ում իր հեղինակային «New Generation» նախագծի գաղափարի համար արժանացել է մեդալի: Բեթթին ԱՄՆ-ում տարածման և իրազեկման արշավ է իրականացրել, որից հետո շատ պատանիներ են ցանկություն հայտնել միանալու նրան ու իր նախագծին:
2017 թ.-ին Բեթթին ԱՄՆ-ում ավարտեց Showcase & Acting Career ծրագիրը և ամերիկյան գործակալություններից համագործակցության առաջարկներ ստացավ:
2018 թ. ԱՄՆ-ի Կոնգրեսը Բեթթիին գրին քարտ հանձնեց բացառապես իր գործունեության, անցած ճանապարհի, նվաճումների հիման վրա:
2018 թ. արտիստը պայմանագիր կնքեց ամերիկյան հեղինակավոր գործակալություններից մեկի հետ, որն իրականացնելու է Բեթթիի առաջխաղացումն ամերիկյան մեդիա ոլորտում:
2019 թվականին Բեթթին նկարահանվել է ամերիկյան հեղինակավոր WarnerMedia-ի HBO հեռուստատեսության նոր՝ «Էյֆորիա» (Euphoria) նախագծում:
2020 և 2021 թթ․ ընտրվել է Eurojury 2020-ի և 2021-ի անդամ: Ամեն տարի Eurojury-ները դիտարկում են Եվրատեսիլ երգի միջազգային մրցույթի երգերն ու ընտրում իրենց ֆավորիտներին:
2020 թվականն առանձնացավ ևս մեկ շատ կարևոր ձեռքբերումով։ Բեթթին ԱՄՆ-ում ժամանակից շուտ՝ էքստեռն կարգով ավարտեց ուսումնական ակադեմիան՝ հավաքելով հավելյալ կրեդիտային միավորներ, ընդ որում՝ ֆիզիկամաթեմատիկական առարկաների և անգլերենի ուղղվածությամբ։
2021 թ․ Բեթթին թողարկեց իր նոր՝ Betty World երգի տեսահոլովակը։ Այն ամբողջությամբ նկարահանվել է Բեթթի՝ ԱՄՆ-ում վաստակած գումարով։ Բացի այդ, աշխատանքն առանձնահատուկ է նրանով, որ նաև կազմակերպչական և աշխատակազմի ընտրության աշխատանքն իրականացրել է հենց Բեթթին։ Հատկանշական է, որ այս նախագծում Բեթթին հանդես է գալիս նաև որպես պրոդյուսեր և բեմադրող ու աշխատել է աշխարհի տարբեր երկրների լավագույն մասնագետների հետ։
